PAZO DE ALBARELLOS (MONTERREI)

Proxectos Produtivos

Este proxecto consiste na rehabilitación dunha antiga casa blasonada para a apertura dun hotel de turismo rural tipo B, en Albarellos de Monterrei.

A oportunidade de centrar o hotel rural no enoturismo nace da necesidade actual na zona de aproveitar o actual crecemento da denominación de orixe de Monterrei, que está en auxe coas novas adegas, que se instalan na zona e a demanda e fama dos seus viños, ademais de aproveitar o crecemento de turistas que coa chegada do AVE á provincia de Ourense que demandan novos establecementos hostaleiros máis exclusivos e de calidade, achegando novas experiencias e unha oferta diferente, non só aloxamento.

Para o proxecto contamos cunha zona singular formada por unha antiga casa grande chamada A Cortiña en Albarellos. Trátase dun pazo blasonado do século XVIII, con cuadra anexa, finca de 6,8 ha, pechada cun muro de pedra na que se plantarán 6 hectáreas de viñedo coas uvas autóctonas da DO, un muíño na finca con auga canalizada do río Rubín. A casa conta cunha antiga adega na planta baixa, con barricas e prensas, que se converterá en adega, sala de catas e comedor con bar-restaurante. Na parte alta habilitaranse sete habitacións e unha delas en suite de luxo, todas con baño individual.

A oferta, ademais do aloxamento, consistirá na oferta de visitas guiadas ás adegas e viñedos da DO, rutas a cabalo e/ou en bicicleta, degustacións especializadas a cargo de profesionais, ceas temáticas con produtos da comarca, aluguer de bicicletas, venda de viños da DO e produtos típicos, así como experiencias sensoriais relacionadas co mundo do viño, obradoiros de viticultura, etc.